ەلىمىزدە زاڭ شىعارۋ قىزمەتى ساپاسى دەڭگەيىنىڭ تومەندەۋىنەن بولەك، ەرەكشە ءقاۋىپتى ماسەلەلەردىڭ ءبىرى – عىلىمي مەكتەپ ساباقتاستىعىنىڭ قالىپتاستىرىلماۋى. بۇل تۋرالى اكادەميالىق ادالدىق ليگاسى جالپى جينالىسىنىڭ مۇشەسى تالعات نارىكبايەۆ "وزبەكستاندا زاڭ عىلىمىن دامىتۋدىڭ جانە زاڭ شىعارۋ قىزمەتىن جەتىلدىرۋدىڭ وزەكتى ماسەلەلەرى" اتتى عىلىمي-پراكتيكالىق كونفەرەنسيادا مالىمدەدى.
حالىقارالىق كونفەرەنسيا بارىسىندا باسقارما ءتوراعاسى اكادەميالىق مانساپتىڭ تارتىمدىلىعىن جوعارىلاتۋعا قاتىستى پىكىرىمەن ءبولىستى.
– قازاقستاندا عالىمداردىڭ ورتاشا جالاقىسى 129 مىڭ تەڭگەنى (300 اقش دوللارى) قۇرايدى، ياعني ەلدەگى ورتاشا جالاقىدان ءبىر جارىم ەسە از. ۋنيۆەرسيتەتتەگى جاس زاڭگەر-وقىتۋشىنىڭ جالاقىسى كورپوراتيۆتىك سەكتورداعى بىلىكتىلىگى وزىمەن تەڭ مامانعا قاراعاندا 5 ەسە از، – دەدى تالعات نارىكبايەۆ.
سپيكەردىڭ ايتۋىنشا، بۇل تۇلەكتەردىڭ ۋنيۆەرسيتەتتەن جاپپاي كەتۋىنە جانە كونسالتينگتىك نەمەسە حالىقارالىق زاڭگەرلىك فيرمالاردان جۇمىس ىزدەۋىنە اكەلىپ سوقتىرادى.
– بۇگىنگى تاڭدا قازاقستانداعى بەلگىلى زاڭگەر عالىمداردىڭ ورتاشا جاسى – 65 جاس. ياعني، بىلىكتى عىلىمي كادرلار قارتايىپ جاتىر. سايكەسىنشە، دارىندى ستۋدەنتتەردى دايىندايتىن ەشكىم جوق. بۇل ۆاكۋۋم وتە ءقاۋىپتى قۇبىلىس. سوندىقتان ءتيىستى شارالاردى قازىردەن باستاپ قابىلداۋىمىز كەرەك، – دەدى ول.
كونفەرەنسيا بارىسىندا سپيكەر جوعارىدا اتالعان ماسەلەنى شەشۋ ءۇشىن جوعارى وقۋ ورىندارىندا لايىقتى جالاقىنى قامتاماسىز ەتۋ ارقىلى جاس مامانداردى عىلىمي ورتاعا بەلسەندى تۇردە تارتۋ قاجەت ەكەنىن باسا ايتتى.
